Vottar Jehóva bjarga deginum!

Nú um daginn kom ungur strákur að leggja rafmagn þar sem ég vinn.  Ekkert merkilegt nema hann var víst Vottur Jehóva.  Hann má ekki halda Jól og afmæli sem undir venjulegum kringumstæðum er frekar fúlt en eins og árar hjá landanum í dag er þetta alveg ofboðslega snjallt.  Þarna er hægt að spara milljarða og borga niður skuldir.  En þetta var nú samt ekki það sem honum fannst best við trú sína.  Hann nefndi alveg sérstaklega svokallaðar grunn reglur sem gerðu mikið fyrir hann.  T.d. ef þú veist að vinur þinn er á bremsulausum bíl en hann ekki áttu að láta vita.  Þetta fannst stráksa alveg svakalega góð regla og tók fram að hann færi eftir henni.

Ég sagði við hann að ef vottarnir hefðu vott af skynsemi og hjartahlýju þyrftu ekki að skrifa niður svona reglur heldur væri þetta bara sjálfsagt mál.  Hann viðurkenndi að vottarnir hefðu nú ekki einkaleyfi á góðmennsku en samt væri nú gott að vera vottur.  Hann gæti vottað það og foreldrar sínir líka.  Ég vottaði honum samúð mína og hélt honum síðan á tveggja tíma spjalli um trúmál.