Mamma og ég.

Það hlaut að koma að þessu.  Ég vildi ekki vera síðasti Íslendingurinn sem ekki bloggar.  Fyrst mamma gerir sig líklega til að byrja á þessum ósóma verð ég bara líka! 

Það skal játast að fáfræði mín er töluverð.  T.d. veit ég hvorki hvað feminismi né blog þýðir og það truflar mig.  Vonandi tekst að bæta úr því fljótlega því þessi tvö fyrirbæri ætla að verða mjög fyrirferðamikil þetta árið.

Það liggur eitthvað í loftinu.  Tími breytinga er framundan hjá okkur.  Íslendingar, íslenska þjóðin og allir ofaldir jarðarbúar munu upplifa miklar breytingar.  Fjölmiðlar og fjölmargir einstaklingar munu færa okkur fréttir í beinni, alla daga ársins 24/7.  Allir munu heyra og sjá um leið og hlutirnir gerast. 

Ísland og Íslendingar munu koma sér á framfæri við ráðamenn og leiðtoga heimsins.  Við verðum áberandi í fréttum og áhrif okkar vaxa.   Latibær, hvalveiðar, seta í Öryggisráðinu, Bjórólfur, Jón Ásgeir, Bakkabræður, Batman, Clint Eastwood, George Bush eldri, Barak og íslenskt landslag í erlendum auglýsingum.