Mótmælandi vikunnar

Á laugardaginn var gerði ég mér far niður í bæ til að mótmæla ranglæti og stjórnvöldum.  Ég var mættur niður á Austurvöll í kulda með hor í nös en að öðru leyti var ágætt veður.  Fyrsti ræðumaður hrópaði lágt að þjóðin ætti ekki að láta bjóða sér þetta lengur.  Þar sem ég hafði mætt aðeins of seint var ég aldrei alveg með það á hreinu hvað það var sem ég ætti ekki að láta bjóða mér.  Lélega ríkisstjórn, óheiðarlega ráðherra, lygna bankamenn eða heimska kjósendur. 

Ég held þó að kallinn á kassanum hafi verið að heimta einhverjar aðgerðir fyrir "óheppna" lántakendur sem voru svo vitlausir að taka bankalán á sína eigin kennitölu.  Í huga mínum kallaði ég hátt og hærra en allir aðrir "Niður með stjórnina og nei þýðir nei."  Þegar hér var komið sögu sá ég tvo löggubíla tilbúna að ráðast til atlögu ef ófriðarseggir tækju sig til og færu að kasta eggjum.  En til þess kom þó ekki.  Mér til sárra vonbrigða.

Því ég hafði haft fyrir því að koma með nýju myndavélina mína.  Ég dó þó ekki ráðalaus og þrammaði í gegnum þvöguna og út í Tjörn.  Þó ekki alveg út í hana miðja heldur staðnæmdist ég á tjarnabakkanum.  Þar voru komnir litlir mótmælendur ásamt foreldrum sínum að gefa bra bra brauð.  En ekki bara einhvert bra bra brauð heldur Heimilsbrauð úr Bónus á krónur 144.  

Nýja myndavélin virkaði fínt og ég náði nokkrum góðum myndum.  Gæsirnar tóku mesta plássið og létu eins og ungliðahreyfingar stjórnmálaflokkanna.  Gargandi út í loftið og blautar bak við eyrun.  Svanirnir höfðu greinilega meira vit og héldu sér í hæfilegri fjarlæg frá skuldsettum foreldrunum.  Ekki ósvipað og ráðherrar í ríkisstjórn Íslands.  Tilbúnir að éta brauðið en líka forða sér ef einhver gerist of nærgöngull.

Eftir nokkrar kaldar mínútur við Tjörnina fór ég aftur í mótmælin.  Kallinn á kassanum hafði breyst í konu sem hvatti alla til að koma aftur næsta laugardag og helst með fleiri með sér.  Þannig næðist árangur og bla bla.  Ég er nú ekki alveg viss með að meira bla bla skili árangri.  Það voru nefnilega læti og líkbrennur sem hröktu síðustu ríksstjórn frá völdum.  Og náttúrulega mikilmennskubrjálæði Samfylkingarinnar.  Ekki má gleyma uppdópuðum unghippum úr VG og grímuklæddum löggum í dulargerfi.